疫情關係，在課程開始時的期都以網上上課後，近期終於開始實體上課。

雖然網上上課較方便，但我較喜歡上實體課，皆因能更認識同學仔，傾吓講吓，整件事有趣得多。

同學發起每月一晚食好啲亦飲吓酒，求之不得! 剛剛的週五晚大家便殺上山林道沖菜，不亦樂乎!

前菜先來一客涼拌魚香鮑魚海參，辣辣哋幾醒胃。

接著是黃金鍋巴蝦多士。今時今日不多地方有蝦多士供應，這裡的很香口，係正嘅。

蜜汁鳳肝黑毛豬叉燒，叉燒我覺得好過利苑。

胡椒銀杏燉豬肚湯，老闆沖哥特地出來介紹湯無下鹽無下雞粉，只以計算鹹菜多寡來調味。這講求手工，效果亦好好，喝完不口渴。

油浸荀殼並不像別的酒家變了油炸荀殼，吃起來嫩滑，啖啖肉。

豆酥黃金北海道元貝，隻隻飽滿。豆酥真是用新鮮黃豆做，而不是用弄完豆漿後的豆渣做，吃起來較鮮味鬆化。

梅乾菜東坡肉，席間同學說是男人恩物，皆因無益老婆通常唔俾叫，當晚大家都破戒，當晚的好甘香，不感到油膩。

梅菜蒸三寸芯後，來了隻獅頭鵝。感覺和灣仔鹵八飯店的差不多。鹵八飯店的其實不錯，是贊美。

飯後加上腐竹薏米糖水，不太甜，味道剛好。

酒逢知己千杯少，平日和太太在家開一支太多，難得當日有酒腳，盡興地飲。我嚮往的生活，是間中朋友來到家中，吃簡單外賣，但飲返幾杯傾吓偈，一樂也。

太太說，老闆沖哥是因有感出街找不到好嘢食，便把心一橫開餐廳，是誠意之作。當晚每人七百五十元，不收開瓶費，性價比算高。

相比起高價西餐靜靜吃，我更喜愛圍著圓檯熱鬧吃。當晚很盡興。失落的時候，便吃好一點調劑，有治癒作用。

沖菜
尖沙咀山林道50號俊橋商業中心9/F
(港鐵佐敦站 D 出口, 步行約7分鐘)
90942362
註: 有代客泊車


阿平
寫於香港
2021年8月22日